Nanawagan ang mga leader sa Kamara kay Vice President Sara Duterte na kumbinsihin ang kapatid na si Davao City Representative Paolo Duterte at asawang si Atty. Mans Carpio na humarap sa pagdinig ng Quad Committee upang ilahad ang katotohanan.
Kasunod ito ng isiniwalat ng dating Customs Intelligence Officer na si Jimmy Guban hinggil sa umano’y koneksyon nina Duterte at Carpio sa ilegal na droga.
Ayon kay House Deputy Majority Leader Jude Acidre, sa halip na maglabas ng mga pahayag na naglilihis sa mga isyu ay mas makabubuting tumulong na lamang ito na mahikayat ang mga kaanak na dumalo sa imbestigasyon.
Iginiit ni Acidre na para ito sa kapakanan ng kanyang pamilya at ng mgha Pilipino.
Tiniyak din nito sa pangalawang pangulo na igagalang ng Kamara ang katayuan nina Duterte at Carpio lalo’t wala umanong bahid ng pulitika ang pagdinig.
Dagdag pa ng kongresista, kung walang itinatago ang dalawang personalidad ay wala silang dapat ikatakot kaya mas magandang sagutin na lang ang mabibigat na alegasyon ni Guban.
