Nagadangat sa 242 gikan sa kabug-usan nga 473 ka kabarangayan sa probinsiya sang Capiz ang apektado karon sang hog-disease ukon balatian sa mga baboy nga African Swine Fever (ASF).
Ini ang base sa datos, as of June 6, 2023, nga ginpresentar ni Dr. Leonel Abordo sang Office of the Provincial Veterinarian sa ginpatawag nga emergency meeting sang Provincial Disaster Risk Reduction and Management Council.
Sa interview sang Brigada News FM kay Kapitan Roberto “Maaw” Roldan, ginpahayag sini nga kun sa tion nga ipaidalom sa state of calamity ang probinsya, sigurado gid nga pagakulangon ang suplay sang baboy sa Teodoro Arcenas Trade Center.
Suno pa kay Roldan, ginapangabay lang nila kay Governor Castro nga kun mahimo magakuha sila sang suplay sang baboy sa iban nga probinsya nga wala sang kaso sang ASF.
Dugang pa sini nga sa pihak sang kaso sang ASF, wala naghulag ang presyo sang kada kilo sang baboy nga ila ginabaligya.
Mahibaluan sa mga apektado nga kabarangayan, 15 diri ang gikan sa banwa sang Maayon; 1 sa Dumarao; 21 sa Pilar; 30 sa Roxas City; 18 sa President Roxas; 42 sa Panay; 7 sa Tapaz; 26 sa Panitan; 26 sa Pontevedra; 15 sa Ivisan; 10 sa Sapian; 8 sa Sigma; 3 sa Cuartero; 20 sa Dao; may nabalhag nga suspected case kag mortalities sa mga banwa sang Mambusao kag Dumalag; kag hilway pa sa nasambit nga hog disease ang Jamindan.
Samtang nagdangat naman sa 19,375 ka mga baboy ang na-infect sang sini nga sakit kun sa diin kapin 2,650 ang natigayon nga ma-dispose.
Bangud diri, apektado gid ang 3,983 ka mga hog farmers ukon nagahupot sang baboy sa probinsiya.
Sa sini nga kaangtanan, magadeklarar si Governor Fredenil Castro sang state of calamity sa probinsiya para sa ilabi pa nga masangkaron nga lihok batuk sa ASF subong man mas mabuligan ang apektado nga sekta sang nasambit nga hog disease.
Ginmandu sini sa PDDRMO ang pagdangop sa Sangguniang Panlalawigan para sa pag-adoptar sang resolusyon natuhoy sa nasambit nga deklarasyon. | Judy Ann Juare
