Aprubado na sa ikatatlo kag pinal nga pagbasa sang Sangguniang Panlungsod sang Roxas City ang “No Helmet, No Driving” Ordinance nga igapatuman sa palibot kag sentro sang syudad.
Ini nga ordinansa ang ginaduso ukon gin-author ni City Councilor John Paul Arcenas – chairman sang Committee on Infrastructure, Public Works and Beautification, kaupod ang co-author kag sponsor nga sanday City Councilors Atty. Paul Ivan Baticados kag Atty. Albert Gregory Potato.
Sa interview sang Brigada News FM kay City Councilor John Paul Arcenas, ginpahayag sini nga sa nasambit nga ordinansa tinutuyo sini nga makasalbar sang kabuhi bangud madamo na sang nagakatabo nga aksidente sa dalanon kag nagaresulta sang kamatayon.
Dugang pa ni Arcenas, mangin epektibo ang pagpatuman sang ordinansa 15 diyas matapos ang final publication kag dapat ini ang igapatuman sa bulan sang Hulyo apang luyag pa nila nga hatagan sang oras ang mga tawo nga mapahibalo kag oras nga makabakal pa sang helmet nga nagasantu sa “specifications” sang Department of Trade and Industry (DTI).
Otorisado sa pagpangdakop sa mga nagalapas sa sini nga ordinansa amo ang Traffic Management Unit (TMU) Roxas City PNP kag City Ordinances and Regulations Enforcement Unit (CORE).
Mahimo nga magapangatubang sang penalidad ang sinuman nga magalapas sa sini nga ordinansa:
1st offense: P500
2nd offense: P1,000
3rd offense: P3,000
4th & Subsequent: P5,000
Nagalaum si Arcenas nga maintindihan sang publiko ang amo nga ordinansa kay luyag lang nila nga amligan kag proteksiyunan ang mga motorista. | Judy Ann Juare
