BAG-O na ang konsehal nga mogunit sa pipila ka ‘major’ committee sa Sangguniang Panlungsod (SP) sa GenSan. Dungan sa gihimong reshuffling ug pag-apruba sa konseho sa resolusyon nga nagdeklarang ‘vacant’ sa chairmanship sa 34 ka komitiba.
Human sa pipila katuig nga pagunit ni Konsehal Franklin Gacal Jr., sa committee on finance ug games and amusement. Naadto na karon ang chairmanship sa finance kang Konsehal Vivencio Dinopol ug kang Konsehal Brix Tan ang games and amusement.
Samtang human gibalibaran ni Konsehal Richard Atendido ug Franklin Gacal Jr., ang paghupot sa komitiba sa transportasyon. Subling gidawat ni Konsehal Dominador Lagare Jr., ang maong komitiba human sa pagluwat niini sa pwesto atong 2017.
Gipalagan usab ni Gacal Jr., ang pag-unseat kaniya sa mga komitiba nga gihuptan ug gitawag nga ‘konsuelo de bobo’ ang pagbutang kaniya sa duha ka komitiba asa usa niini ang committee on Justice and Human rights.
Una nang gibutyag sa konsehal nga buot siyang palagputon sa pwesto aron di niini mababagan ang giduso nga P2 bilyon nga loan sa siyudad alang sa pipila ka proyekto. ( Richel Gubalani)
