WALAY natala nga bag-ong variant sa Covid-19 sa GenSan luyo sa padayong pagsaka sa locally transmitted infections.
Matud ni Dr. Rochelle Oco, labaw sa City Health Office (CHO), wala nasuta nga presensiya sa Covid-19 mutant strains gikan sa gipadala nilang sample sa University of the Philippines-Philippine Genome Center (UP-PGC) nakalabay’ng semana.
Kahibaloan nga nakatala og duha ka kaso sa variants ang GenSan apan nakarekober gilayon ang pasyente. Mayo 12 dihan g gikumpirma sa siyudad ang pagka-detect sa Covid-19 variants gikan sa duha ka returning overseas Filipino workers nga naimpeksyon sa Alpha o B1.1.7 (United Kingdom) ug Delta o B.1.617 (India) strains.
Duna usab natala nga Alpha variant atong Abril 12 gikan sa returning authorized person outside reside (APOR) nga naka-impeksyon sa iyang duha ka close contacts nga gikumpirma atong Abril 20.
Kini ang rason sa pagpakusog pa sa siyudad sa surveillance sa 26 ka barangay sa dakbayan. Giangkon ni Oco nga makaalarma ang sitwasyon karon sa GenSan tungod naa sa 56% sa confirmed cases ang symptomatic. ( Richel Gubalani)
