KABANKALAN CITY, Negros Occidental — Iga-pasundayag sang Bukidnon-Magahat tribe sang Sitio Madaja, Barangay Buenavista, syudad sang Himamaylan, ang ila mga produkto nga himo sa tikog sa tuigan nga Bulawan Fair sa maabot nga Mayo 27, sa Ayala Capitol Central sa syudad sang Bacolod.
Ang ila kumonidad ang nagalayo sang halos 15 kilometros, gikan sa city hall sang nasambit nga syudad, kag anay mabaskog nga masa sang New People’s Army, bangud sang iya lokasyon.
Tuig 2021 sang gin-deklarar sang gobyerno ang lugar nga “conflict-cleared”, kag amat-amat nga gin bubu-an sang serbisyo sang gobyerno, paagi sa Community Support Program (CSP) sang 94th Infantry Battalion.
Sa pagsulod naman sang isa ka non-government organization nga Association of Negros Producers (ANP) sa lugar sang 2022, gin-hanas ang pumuluyo sa pag-ubra sang mga produkto parihas sang banig, kalo, placemats, kag iban pa, nga himo sa tikog, isa ka klase sang hilamon nga bastante sa lugar.
Matapos ang masobra isa ka tuig, ang ila mga produkto ang nakalab-ot na sa Manila kag sa luwas man sang pungsod, bangud sang kabakod kag kanami sang pag-ubra, lakip na ang pinasahi nga estorya sang ila komunidad.
Ang pag-pasundayag sang ila produkto sa Bacolod ang mangin isa sa pinaka-madako nga kahigayunan nga mapakita ang kasagad sang mga pumuluyo kag maka-bulig man pasanyog sang ila kumunidad, mas malayo sa anay magamo nga lugar.*