Reymund Titong
KABANKALAN CITY, Negros Occidental — Sa patag sang politika, ang tinaga nga ‘isyu’ ang indi bag-o sa tagsa-tagsa ka mga tawo.
Sa banwa sang Cauayan, para sa 2025 local elections, duwa ang magapapili sa pagka-alkalde – si incumbent mayor John Rey Tabujara kag ang negosyante nga si Jurry Nabaja.
Sang Oktubre 1, sa una nga adlaw sang filing sang certificate of candidacy (COC), nag-post si Nabaja sa iya social media account nga gina-alegar may gakabatonan ini nga pagpamahog sa iya kabuhi, lakip na ang iya political team.
Ang post sang negosyante, nagapakita sang mga tawo nga gina-alegar nagakuha sang litrato gikan sa ika duwa nga panalgan sang munisipyo sang banwa, sa tion nga yara ang ila team sa idalum sang munisipyo nga naga-park.
Matapos nag guwa ang balita sa publiko, nag pabutyag sang reaksyon ang isa ka Sanguniang Bayan Member sang banwa nga si Greg Carlo Sumugat, nga ‘na-insulto’ sa post sang negosyante.
“As an elected official sa Cauayan, bisan ara man ko ukon wala sa administrasyon ni Tabujara, na-insulto ako nga imo ipost sa social media ang tinaga nga may “Multiple Threats” ka, samtang ginapakita ang footage nga nagapakita sang estruktura sang Municipal Hall,” pahayag ni Sumugat.
“Tani ma-huna-huna niya ang iya gina-buhat kung ina maayo ukon indi. Sa mga tawo nga yara sa likod niya sini ukon utok sang nasambit nga arte ukon drama, tani namion nyo man dason para mapatihan. They have all the access to the police sang banwa,” dugang pa sang konsehal.
Samtang, pahayag ni Nabaja sa isa ka press conference sang Oktubre 4, matapos ang gina-alegar pagpamahog nga nagluntad sa una nga adlaw sang filing sang COC, naka pa-blotter sila sa kapulisan sang banwa, lakip na ang mga blotter reports sang tinalikdan nga mga binulan.
“Siling nila wala kami naka pa-blotter. Ang akon upod nga si SP Shem, siya mismo ang nagpa-blotter and we can provide you sa amon gin-blotter. So, makit-an niyo diri kun sin-o ang nagahambal sang matuod,” pahayag ni Nabaja.
Madumduman nga una na nga ginpahayag sang hepe sang banwa nga si Lieutenant Colonel Lowell Garinganao sa Brigada News FM-Kabankalan sang Oktubre 1, nga wala sila may nabatonan nga complaint gikan sa bisan sin-o nga political aspirant sa banwa nga gin-harass sa pag-file sang ila COC.
Ginsabat man ni Nabaja ang pahayag ni Sumugat tuhoy sa mga pasilidad sang gobyerno nga gina-alegar wala gina-pagamit ang iya grupo, kag nanindugan nga naga-coordinate sila sa mga barangay kag buluthuan sa banwa, apang gina-alegar wala sila giyapon gina-pausar sang pasilidad.
Sa piyak nga bahin, sa mga alegasyon nga gina-haboy sa iya, lakip na ang issue sa iya negosyo, personalidad, kag kompanya, nanindugan ini nga wala siya sang kaso kag lehitimo ang iya mga negosyo.
“I can show the legitimacy of the business. And ginhimo ko, nagkuha ko sang municipal court clearance, supreme court clearance, NBI, I actually took my police clearance diri sa Cauayan, and recently I just got my US visa, to prove that I don’t have any cases, and to prove nga sila lang na ga himo-himo sila,” pahayag ni Nabaja.
Si Tabujara ang nag pagguwa man sang iya official statement matapos nag-post ang negosyante, kag gintawag nga libelous kag slanderous ang gin-post ni Nabaja sa iya Facebook page.
Gin-deny man sang alkalde ang mga alegasyon ni Nabaja nga may pagpamahog sa iya kabuhi, kag gina-respeto ang kinamatarong sini sa pagpapipili sa pwesto. -BNFM Kabankalan
