BICOL—Magkakaroon ng dagdag-singil sa kuryente sa lalawigan ng Albay ngayong buwan ng Oktubre. Base sa anunsyo ng Albay Power and Energy Corporation (APEC), tataas ng 0.6478 centavos ang electric bill dahil sa mataas na generation charges mula sa mga power suppliers bunsod ng mataas na coal prices.
Dahil dito, mula sa P10.8699 ay magiging P11.5177 per kilowatt hour na ang singil sa residential consumers habang P10.5373 per kilowatt hour naman mula sa dating P9.8895 per kilowatt hour ang magiging singil sa commercial consumers.
Ang high voltage consumers naman ay magiging P9.2540 mula sa dating P8.6641 per kilowatt hour. Mangangahulugan ito ng P129.56 na umento sa kabuuang bayarin sa kuryente ng isang residential at low voltage consumers na kumukonsumo ng 200 kWH kada buwan habang 0.5899 per kWH naman sa mga high voltage accounts.
Ayon sa APEC, sa kabuuang electricity charges, direktang napupunta sa power suppliers ang generation charges, napupunta naman sa National Grid Corporation of the Philippines (NGCP) ang revenue sa transmission habang ang buwis at iba ang public policy charges gaya ng Universal Charges at Fit-All ay inireremit sa gobyerno.### || slm
