Nag-angkun kang menor nga pilas sa natuo nga butkun si Gian Ceballos Bajala, 33 anyos, kag residente kang Brgy. Igpalge, Barbaza, samtang wara naman nahalitan ang pasahero ka dya nga si Antonio Alabado Bajala, residente kang Brgy. Aligtos, Barbaza, matapos nga nagtakilid ang ginasakyan nga SUV sa Brgy. Igbarawan, Patnongon, las-3:25 sa hapon, kahapon nga adlaw, Agosto 9.
Suno sa impormasyon kang kapulisan, las-3:28 sa hapon kang amo nga petsa, nakabaton kang tawag ang Patnongon Municipal Police Station halin sa sangka pumuluyo natuhoy sa sangka digrasya nga nagluntad sa national highway kang nasambitan nga barangay.
Nagaguwa sa imbestigasyon nga samtang nagabyahe ang mga persona halin sa banwa kang San Jose paadto kun daad sa Brgy. Igpalge sa Barbaza, naturugan ang driver kang sarakyan nga si Gian kag aksidente nga nahulog sa kanal ang sarakyan kag nakabunggo pa sa sementado nga kilometer post kag nagtakilid sa natuo nga bahin kang aspalto nga dalan.
Samtang, gilayon naman nga gintugruan kang pagbulong kang nagresponde nga katapo kang MDRRMO Patnongon ang mga persona kag nag-angkun kang wara pa ma man-an nga balor kang kahalitan ang nasambit nga sarakyan.
