-Reymund Titong
KABANKALAN CITY, Negros Occidental — Overall 6th place kag rank two sa 16-29 years old 21K female category ang isa ka Sipalaynon sa bag-o lang natapos nga international running event sang Hunyo 9, sa Laguna Phuket Marathon 2024 sa pungsod Thailand.
Nakuha sang 21-anyos nga si Myrel Benignos ang duwa ka pwesto, sa una niya nga pag-pakigbahin sa nasambit nga international running event.
Nangin kwalipikado si Benignos sa amo nga kompetisyon bangud siya ang isa sa pinaka-madasig magdalagan sa 7-Eleven Run 2024 sa syudad sang Iloilo City, tinalikdan nga bulan sang Pebrero, nga amo naman ang qualifying race, antis makasulod sa nasambit nga marathon sa Phuket.
Pito pagid ka deligado sang pungsod Pilipinas nga nakakuha man sang pwesto sa 42K kag 21K male and female category sang hampang.
Ang Laguna Phuket Marathon ang gina-kabig nga isa sa pinakadako nga sporting event sa pungsod Thailand, sa diin ginatos nga mga running enthusiasts gikan sa nagkalain-lain nga parti sang kalibutan ang naga-pakigbahin.*
