GI-ANUNSYO sa presidente sa Gensan Meat Vendors Multipurpose Cooperative ang pagsaka sa presyo sa karne nga ilang ginabaligya sa merkado gumikan usab sa pagtaas sa demand gikan sa kaulohang Manila.
Sa kumpermasyon ni Toto Mosqueda sa 89.5 Brigada News FM Gensan Nobyembre 2 sa kasamtangan nga tuig ang presyo sa karneng Baka nisaka gikan sa P330 ngadto na sa P350 pesos sa matag kilo samtang ang karneng baboy ang unod anaa sa P280-290 pesos matag kilo gikan sa P260 pesos sa bulan sa Agusto ug Septembre tuig 2021.
Gipaklaro ni Mosqueda nga ang baynte pesos nga usbaw sa presyo sa karne, ang hinungdan niini mao ang pagtaas sa demand gikan sa Manila unya nitaas ang farm gate price nga ilang ginakuhaan, mao na daw kini ang trend sa matag tuig basta padulong ang Kapaskuhan.
Ang ubang presyo sa ribs, tiil, maskara sa baboy anaa sa P240 pesos matag kilo, ang laman loob P100 pesos samtang ang atay- P150 pesos matag kilo.
Gidugang ni Mosqueda nga hangtud karon nagpabilin ang polisiya nga bawal ang pagkumpra nila og hayop o karne sa ubang dapit mao nga nagsalig sila sa mga piggery ug sa ubang supply gikan sa mga mag-uuma.
Tungod sa usbaw sa presyo ginapahibalo ni Mosqueda sa mga consumer nga dili lang matingala kon adunay pag-usbaw sa presyo sa karne sa baka ug baboy sa palengke. ( Ver Diazon)
