Inanunsyo ng Malacañang na isasama na sa case count ng COVID-19 sa Pilipinas ang bilang ng mga nakakuha ng positibong resulta mula sa rapid antigen tests.
Sinabi ni Presidential Spokesperson Harry Roque na inaprubahan ng Inter-Agency Task Force on COVID-19 ang naturang desisyon upang makita ang bigger picture sa kinahaharap na pandemya ng bansa.
Gayunman, nilinaw ni Roque na magiging subject pa rin para sa confirmatory tests ang mga nagpopositibong kaso.
Inihayag ng opisyal na may kinalaman ang naturang hakbang sa pagsisikap ng gobyerno na mapabuti ang reporting ng COVID-19 cases.
Iginiit naman ni Roque na imo-monitor ng regional IATF at ng Center for Health Development ng Department of Health ang alokasyon at paggamit sa antigen kits.
