ANAA na karon sa Municipal Civic Gymnasium ang mga residente nga naapektuhan sa pagbaha sa Alabel, Sarangani Province.
Sa initial report sa Municipal Social Welfare and Development Office o MSWDO anaa na sa 200 ka tawo ang gidala sa Municipal Gymnasium human sa pagbaha sa purok Masagana, Poblacion. Kini ang gilangkuban sa mga gagmayng bata ug mga senior citizen.
Una niini, gipagawas sa Alabel Information Office ang video sa grabeng pagbaha sa
National Highway sa Brgy. Ladol ug Brgy. Kawas sa maong munisipalidad.
Giabisohan ang mga motorista nga mag-amping labi na nga nasinatian ang maut nga panahon sa Mindanao ning panahuna.
Gilayun usab gidispatsa sa Alabel LGU ang mga rescuers asa lakip mitabang sa mga nabahaan ug na-stranded sa baha ang kapulisan sa Alabel, asa gipabakwit ang mga residente nga duol sa mga sapa.
Ning adlawa magpahigayon og assessment ang LGU aron masuta ang kadaut sa pagbaha.
Lakip naguba sa pagbaha ang Mulo Suspension Foot Bridge sa Purok Upper 2, Barangay Poblacion nga apil nga i-assess sa MDDRMC.
Butyag usab ni Rene Punzalan, labaw sa PDRRMO sa Sarangani nga sutaon pa nila ang damyos sa pagbaha, asa ang Alabel ang maoy nagrabehan tungod sa padayung pag-ulan.
