Nagsilinggit ro mga estudyante halin sa College of Fisheries and Ocean Sciences it UP Visayas matapos nanda nga masaksihan ro mga dolphins sa kaeawran it Brgy. Camanci Norte, Numancia, Aklan.
Raya hay kabahin it andang Learning and exposure trip activity.
Masadya man nga nagahampang ro mga dolphins samtang nagasunod sa baroto nga ginasakyan it an-um nga estudyante.
Kaibahan man nanda kara ro taga Office of the Provincial Agriculturists Division of Fisheries, Dept. of Agriculture-Numancia, Bantay Dagat ag MDRRMO-Numancia, nga nagapatigayun man it monitoring ag sightings it mga dolphins halin sa kaeawran nga sakop it Brgy. Camanci Norte hasta sa Brgy. Navitas, Numancia, Aklan.
Ginaboebanta nga kapin sa 50 hasta 100 dolphins ro nagpakita kainang agahun. / ANN DESLENE SALAZAR
