Ginmanduan ni Tapaz Mayor Roberto ‘Nonong’ Palomar ang Municipal Engineering Office nga magpatigayon sang inspeksyon agud gilayon nga makaubra sang tangke sang tubig nga sarang makuhaan sa tion sang sunog.
Ini ang kabahin sang nangin pahayag ni Mayor Palomar sa ginpatigayon nga Weekly Flag Raising may kaangtanan sa natabo nga sunog sa Barangay Poblacion, Tapaz, Capiz.
Ginahatagan ni Mayor Palomar sang 24 oras ang Municipal Engineering Office sa pagpamuno ni Municipal Engineer Victorio Jimenez agud magpangita sang lugar sa banwa nga sarang mapaubrahan sang tangke sang tubig agud diri madasig makakuha sang suplay sang tubig ang mga katapo sang bumbero sa tion nga may magluntad liwat nga sunog.
Ginpasalig man ni Mayor Palomar nga pagahatagan sang bastante nga pondo ang pagpaubra sang tangke.
Ginmando man sini nga umpisahan na gilayon subong nga semana ang konstruksyon sini.
Matandaan nga totally burned ang 11 ka mga pwesto sang kalan-an, sari-sari store kag iban pa nga mga balaligyaan samtang partially burned naman 3 ka mga pwesto matapos ang nagluntad nga sunog.
Mahibaluan nga sandig sa imbestigasyon sang Bureau of Fire Protection – Tapaz Municipal Fire Station, madasig nga naglapta ang kalayo rason nga wala sang may nasalbar nga madamo nga pagkabutang ang mga tag-iya sang pwesto.
Maswerte na lamang kag wala sang may napilasan sa amu nga insidente.
