KALIBO, AKLAN — Mahina gihapon ro pagbaligya it mga bueak iya sa banwa it Kalibo para sa nagahilapit nga pag obserba sa Pista Minatay.
Sa pahayag sa Brigada News FM Kalibo ni Mrs. Melrose Ibañez, tag-ana it 3 Sisters Flowershop sa Roxas Avenue, Kalibo, mahina ro andang benta halin pa kat nag umpisa ro covid-19 pandemic.
Aminado man imaw nga mahae ro presyo it mga bueak bangud mahae man ro andang buoe sa andang supplier partikular sa Baguio.
Ginhayag man ni Ibañez nga kaabuan eon lang sa andang baligya nga bueak hay ginapilak sa basurahan bangud indi eon mabakae.
Ginasaligan eon lang segun nanda ro mga walk-in bangud owa eon it masyadong naga order it bulto o maabuan.
Ro mga presyo it bueak nga andang baligya hay tig P90 to P100, may tig 250 pesos, depende sa klase ag kaabuon it bueak nga ginabakae. / ANN DESLENE SALAZAR
