GIPADAYON sa local government unit sa General Santos City ang plano alang sa Traffic Signalization System nga nagakantidad og P418 million pesos.
Sa kumpermasyon ni City Budget Officer John Philip Quemosing nga ang orihinal nga plano anaa sa P500 million pesos apan anaa lang sa P460 million ang natigum nga pondo gikan sa managlahi nga sources.
Samtang ang kapin og kulang P30 milyunes pesos na-revert usab gumikan ang pondo nagikan sa Disaster Risk Reduction Fund, nabalik sa General Fund gumikan adunay polisiya nga ang DRRM fund kon dili magamit sa sulod sa lima katuig mabalik kini sa General Fund ug magamit lang sa social services nga katuyoan.
Gipaklaro ni Quemosing nga managlahi ang gigikanan sa pondo para sa Traffic Signalization ug managlahi nga tuig ang appropriation hangtud natigum ang P460 million pesos unya na-revert kaniadtong katapusan sa 2020 ang gikan sa DRRM Fund.
Gipaklaro ni Quemosing nga ang pag-revert sa pondo sa usa ka sugyot nga proyekto wala sa ilang pagbout kondili sa Mayor subay sa mga balaud.
Samtang Agusto 19 ang Bids and Awards Committee ug ang Technical Working Group kuyog ang usa ka adviser ug bidders ang nagpahigayon og meeting kung asa gipaminawan ang mga concern sa bidders bag-o pa ang pormal nga bidding process. ( Ever Diazon)
