NAGHATAG higayon ang taga DSWD sa mga senior citizen nga wala naka-adto sa ilang mga venue sa barangay sa pag-release sa social pension nga mokabat sa tag unom ka libo ka pesos.
Sumala sa labaw sa City Social Welfare and Development Office kon CSWDO nga si Rebeca Magante gihatagan og kahigayunan ang mga wala nakakuha sa ilang pension Agusto 20 ug ang nahimong venue ang Model Senior Citizen Center ug ang ikaduhang venue sa Barangay East Elementary School.
Subay sa datus ang wala naka-claim niabot sa 783 ka seniors, apan kon aduna gihapon dili makakuha sa pension gumikan sa wala pa matino nga hinungdan moadto alang sa ilang buhatan.
Usa ka 69-anyos ang niadto usab sa opisina sa senior citizen ug gustong mo-claim sa pension apan ang resulta wala pa naapil ang iyang pangalan, sumala kay Forperio Lamparas wala pa ang iyang pangalan mao nga nipauli na lang.
Kaduha na daw siya nakapa-validate ug gani gikapoy na siya og balik balik hinuon una daw nga nakadawat ang iyang asawa, si Lamparas nagpuyo sa Barangay South.
Samtang gipahibalo ni Magante nga sa wala nakadawat maghulat lang kay adunay sobra pito ka libo pa nga waitlisted nga aprubado na sa DSWD.
Nagpasalmat usab ang center manager sa Senior Citizen Center nga si Edna Angelada nga napili ang ilang center sa releasing aron dili na magkalisod ang ilang kaubanan. ( Ever Diazon)
