“It’s seems to be a mistaken identity”, ini amo ang panugdaon ni Governor Eugenio Jose “Bong” Lacson may kaangtanan sa ginapasuni natabo nga ambush sadtong domingo sang aga , Febrero 20 sa Sitio Villa Elena, Brgy. Palampas, syudad sang San Carlos nga ginkamatay sang tatlo ka persona ginkilala kanday Andre Fajardo, 18, sang Ylagan Extension, Barangay 6, Russel Bacao, 40 residente sang Urban Phase, Barangay Rizal, Rudy de la Fuente, 51 sang San Juan Baybay, Brgy. 6 tanan syudad sang San Carlos. Samtang, isa pa ka biktima ginkilala kay Renante Chui, 27, sang San Juan Baybay sa Barangay 6, yarea sa kritikal nga kundisyon sa San Carlos City Hospital.
Ginpahayag ni Lacson sandig sa iya nabaton nga inpormasyon, indi target sang mga suspek ang nasambit nga mga biktima nga nakasakay sa salakyan nga sedan. Kinahanglan nga makilal-an ukon mahibaluan kun sanday sin-o ang target sang mga suspetsado kag kun ano ang rason kun nga-a ginhimo nila ang krimen kag subong man luyag sini nga mahibaluan ang sa likod sang nasambit nga pagpangluthang ukon ambush.
Sa imbestigasyon sang mga kapulisan ang apat ang sakay sa isa puti nga Mazda nga awto kag magapadulong kuntani sa bulangan sang ginpaarakan sang luthang sang wala makilal-an nga mga suspetsado.
Samtang sa iya nga bahin, ginpahayag ni Vice Governor Jeffrey Ferrer iya ginatugyan sa kapulisan ang pagpangusisa sa natabo nga pagluthang sa apat ka mga magkaupod nga persona sa syudad sang San Carlos. Suno kay Ferrer wala niya gina-tolerar ang kasubong nga kalakasan. / via Nimrod Zabala
