Karamihan o 62% ng lahat ng high school teachers sa pampublikong paaralan ang nagtuturo ng mga subject na hindi naman nila expertise, o hindi nila na-major.
Ang itinuturong dahilan sa mismatch na ito ay ang ginagawang pag-a-assign ng Department of Education (DepEd) ng mga subjects na nakadepende sa availability, imbis na sa specialization dahil sa limitadong budget para sa hiring.
Sa datos na ipinakita ng Second Congressional Commission on Education (EDCOM 2) sa House basic education panel, makikita na higit sa kalahating mga guro sa science ang walang training para sa naturang subject.
Dahil dito pinangangambahan kung paano makasasabay ang mga Pilipinong estudyante sa science-focused na Programme for International Student Assessment (PISA) test sa 2025.
Ayon kay EDCOM 2 Executive Director Karol Yee, ang hakbang na ito ng DepEd ay nakaaambag sa problema sa sektor.
Pinangangambahan naman ngayon ng iba’t ibang grupo ang naiulat na ‘teachers mismatch’ kung saan naghahawak ang mga guro ng mga subject na hindi naman nila major field of study o expertise.
Ayon kay Alliance of Concerned Teachers chaiperson Vladimer Quetua, maraming factor na posibleng dahilan kung bakit ito nangyayari.
Ilan nga aniya rito ang kakulangan sa budget at plantilla positions.
Samantala, sinabi naman ni ACT-Teachers party-list Rep. France Castro na dapat iprayoridad ang epektibong pagtuturo higit pa sa pag-comply lang sa pangangailangan ng curriculum at paaralan.
Ang nangyayari umano kasi dito – kahit hindi mathematics ang specialization – pwede pa ring sa subject na ito ma-assign ang isang teacher.
Aminado naman ang Department of Education (DepEd) na nangyayari nga ang sitwasyong ito.
Paliwanag ni Education Undersecretary Gina Gonong, walang rin kasing sapat na math teachers mula sa mga unibersidad.
