LEGAZPI CITY – Nag-aagrangay na an mga paraoma sa Bicol huli sa nagpaparamahal na presyo kan mga agricultural inputs orog na an mga kaypuhan sa pagtanom ki paroy.
Segun kay National Food Authority (NFA) Bicol Officer in Charge Regional Manager Julie B. Llenaresas, nganing makabawi an mga ini, inaprubaran kan NFA council an paglangkaw sa presyo kan pagbakal kan kada kilo nin paroy na nasa P30 kumpara kapag sa pribado na nasa P25 sundo P27 sana an presyo kada kilo.
Huli sa inisyatibang ini, uminabot sa 490% an nagin akomplisimiento kan ahensya ngunyan na Mayo huli ta buminadol na sa 252,388 an nabakal nindang sako nin paroy sa mga lokal na paraoma kumpara sa dapat target sana na 51,000 na sako sa presenteng bulan.
Mientrastanto, pigsiyerto ni Llenaresas na dai magkakaigwa nin pagkasayang nin bagas asin overstocking por dahil ta dagos-dagos man an saindang pagdistribwer kaini orog na sa mga tios na lugar sa bilog na rehiyon.