LEGAZPI CITY – Mahigot ngunyan na pigbabantayan kan Albay Veterinary Office (AVO) an nagkapira pang mga barangay sa probinsya na posibleng apektado kan African Swine Fever (ASF).
Kun magigirumduman, nagkapirang mga barangay sa banwaan kan Tiwi an tinamaan nin ASF kun sain sobra sa 100 na mga orig an pig-depopulate nganing masiyerto na dai na ini maglakop o makaabot sa mga kataraid na barangay.
Segun kay Provincial Veterinarian Dr. Pancho Mella, padagos an saindang pigsasagibong balidasyon sa nagkapira pang mga barangay na posibleng apektado pa kan ASF.
Sa presente, mahigot an pagbabantay an opisina katabang an mga lokal na gobyerno sa mga border control ngani na malikayan an paglakop pa kan nasabing helang.