MAHIMONG malipayon ang umaabot nga Pasko sa mga nurses, medical technologies, medical specialist ug resident doctor sa Dr. Jorge P. Royeca Hospital tungod laumang madawat na nila ang ilang usbaw sa suweldo sugod Agosto 16 ning tuiga.
Kini ang gibutyag ni Glenville Gonzalez, DJPRH department head asa ang Nurse 1 mahimong makadawat og P26,192 gikan sa kanhing P17,000 kada bulan.
Gawas niini, ang medical technologies gikan sa P22,687 ngadto na sa P26,192, medical specialist sa P40,603 ngadto na sa P46,054 ug resident doctor sa P35,000 ngadto na sa P43,439.
Ang mga regular nurse, gawas sa ilang suweldo may 25 percent pa nga hazard pay kuhaon sa tinigom nga professional fees nga gibayad sa mga doktor ug bahinon sa mga staff sa DJPRH sa formula nga gibasehan.
Gipasalamatan usab ni Gonzales, si Mayor Ronnel Rivera ug HRMDO head Leah Tolimao sa pagduso nga mapatas-an ang suhulan sa mga nurses, medtech, medical specialist ug resident doctors sa pampublikong ospital. Kasamtangan, ga-hire ang DJPRH og 25 ka mga nurses human sila gikulang tungod sa pagbalhin sa uban.
