NAGAPADAYON ang pagtrabaho sa mga ekipo sa munisipyo sa Alabel, Sarangani Province sugod adlaw nga Martes hangtud mahuman ang lugar nga kabutangan sa mga bangka sa mga mananagat nga dili gustong ibalhin sa laing lugar.
Sa pahayag ni Coastal Administrator Ghi Sinoy nga ang mga ekipo nga makita sa lugar naga-ayo sa kadalanan sa kabukiran sa Alabel apan ilaha una gipanaug aron maplastar ang mga mananagat sa Ladol aron dili magdasok sa baybayon nga ilang ginabutangan og mga bangka.
Gituyo daw kini kay dili man mosugot ang mga mananagat nga ibalhin ang ilang docking area sa Kawas gumikan sa daghang mga rason.
Samtang kabahin sa komento sa chairperson sa mga mananagat nga si Nelanie Sinoy nga dili mosugot nga ipaibot ang mga bakawan nga ilang gitanom, aduna na daw silay plano niini, mao ang pagbalhin sa laing area nga gi-designate nga tamnanan sa bakawan.
Butang nga ginasupak sa chairperson gumikan gusto niini nga adunay hustisya sa ilang kahago sa pagtanum sa mga bakawan. (Ver Diazon)
