NAGPAHIGAYON og pagpanghinlo og disinfection sa merkado publiko ang personahe sa market administration atol sa unang Sunday lockdown sa bulan sa Hulyo sa kasamtangan nga tuig.
Sa pahayag ni Market Supervisor Lito Esclamado sama sa ilang ginahimo sukad nagsugod ang pandemya ilaha lamang gipadayon karong panahuna gumikan gilugwayan man ang General Community Quarantine status sa Gensan gumikan sa nagapadayon nga daghang kaso sa Covid-19 Virus.
Sumala kay Esclamado ang una nilang gihimo sulod sa merkado mao ang pagpanghinlo, ilang gibanlasan og tubig ang mga agianan,unya gibutangan og sabon pamatay sa mga hugaw aron nga hinlo na usab kini sugod adlaw nga Lunes.
Gidugang ni Esclamado nga ilaha na kini nga ipadayon matag adlaw nga Dominggo kay dinhi sila makahigayon kay sirado ang palingke ug walay estorbo sa ilang paghinlo.
Nagpabilin usab ang agianan sa mga mamalitay sa palingke pabor sa Santiago Boulivard ug mogawas sa Westside, mahimo usab mogawas sa Cagampang ug sa atbang sa Purok Islam. ( Ever Diazon)
