Ginkumbinse it Malay Transportation Office ro mga residente ag turista nga i-report sa andang taeatapan ro andang mga electric tricycle (e-trike) driver nga nagaeapas sa regulasyon sa Boracay Island.
Matandaan nga indi magnaba sa 10 ka mga reklamo halin sa mga residente ro ginreport ku Pebrero, kaabuan diakra hay ro uwa paghatod sa mga pasahero sa andang mga destinasyon.
Base kay MTRO acting Chief Ryan Tubi, ro mga nasambitan nga mga reklamo hay madasig nga gin-aksyunan. Ginpasakaan it mga multa ro mga nag-eapas agud masulong ro disiplina ag kaayusan it mga motorista.
Dugang pa nana, kaabuan segun sa mga reklamo hay naghalin sa mga residenteng ginbalibaean nga magsakay bangud nagataas eun ro mga numero it mga turista sa isla.
Ginpahanumduman man ni Tubi ro mga commuters nga ireport ro andang mga reklamo sa MTRO Facebook page o tumawag sa hotline o sa Boracay Land Transportation Multi-Purpose Cooperative (BLTMPC) hotline.
Ro MTRO hay may pito man ka mga enforcer katuwang it Municipal Auxiliary Police agud mapatuman ro mga regulasyon ag kasuguan sa trapiko./JIL B. LACSON
