Libertad – Dakup sa ginhiwat nga anti-illegal fishing operation kang Libertad Municipal Police Station kaimaw ang DA-Libertad (Bantay Dagat) sanday Vincent Esbieto, 51 anyos, kag Elmer Salmorin, 49 anyos, lunsay manugpangisda kag residente kang Brgy. Bagongbayan, Buruanga, Aklan nga nagapatigayon kang pagpangisda sa katubigan kang Brgy. Tinigbas, Libertad nga wara kang balido kang permit kang Agosto 4, las-3:00 sa hapon.
Lakip sa mga narecover ang sangka motorbanca balor P25,000; fishing net balor P10,000; kag mga nadawi nga isda ginabanta ga bug-at kang 10 kilos kag may market value nga ginabanta P2,000.
Ginpinahan naman ang mga persona kang P500 kada isara para sa paglapas sa ordinansa nga banwa samtang ginturn-over naman ang mga nakumpiska nga fishing paraphernalia kag mga nadawi nga isda sa DA Libertad para sa nagakaigo nga disposisyon.
