NAGPAHIMANGNO ang kapulisan sa GenSan batok sa mga motorista nga nagmaneho og walay igong dokumento ug wala nagsuot og saktong riding gear. Kini dungan sa pagpatuman sa Enhanced Lambat- Bitag Sakyanan asa 762 ka motorista ang nasita ug natiketan.
Matud ni PLt. Clarizel Perez, tigpamaba sa GenSan City Police Office (GSCPO) sa tibuok gabii atong Biyernes nga pagpahigayon og operasyon. Naa sa 288 ka motorista ang nasita ug naisyuhan og temporary operating permit (TOP) tungod nagmaneho nga nagtsinelas.
Mokabat usab sa 85 ang nasakpan nga walay helmet, 42 ang nagmaneho nga walay OR/CR, 36 ang walay lisensiya. Naa sa 24 ka motorista ang nagmaneho og sakyanan nga walay plaka, 60 ang walay side mirror, 95 ang dunay depektibong suga ug dunay excess nga pasahero.
Gihingusgan ni Perez nga tumong niini masunod ang basic nga road safety policies. Nakatabang usab ang operasyon sa pagkonhud sa kriminalidad aron masuta nila ang mga kinawat nga mga sakyanan.
Lakip ang nagdagan nga mga motorsiklo nga walay rehistro nga posibleng lambigit sa gakahitabong krimen sa dakbayan. Ang operasyon ang alayon sa Oplan Iron clad ni PBGen. Alexander Tagum, regional director sa Police Regional Office (PRO) 12. Asa buot niini nga naa sa dalan nagbantay sa seguridad ang mga sakop 24 oras. I Richel Gubalani
