Priso sa Roxas Component City Police Station ang isa sa tatlo ka mga suspek sa pagpangawat sang pila ka mga products sa dako kag kilala nga pharmacy sa sulod sang mall sa may bahin sang Brgy. Tanque, Roxas City.
Ginkilala ang biktima kay Anne Louise Villaruz, 29-anyos, manager/pharmacist kag residente sang San Roque Street, Brgy. III sining syudad.
Samtang ang mga suspek amo sanday Daisy Mae Pacheco, 29-anyos; Honey Villa, 29-anyos kag John Doe, lunsay mga residente sang Brgy. Lanit, Jaro, Iloilo City.
Sandig sa impormasyon nagikan sa Roxas City PNP, nagpadulong sa ila istasyon sanday Anne Louise Villaruz kag Jean Ruiz mga empleyado sang pharmacy agud ipa-priso si Daisy Mae Pacheco.
Suno sa pagsaysay sang duha ka empleyado sang pharmacy, ila nadakpan sa akto si Pacheco kag mga kaupdanan sini nga nagapangawat sang pila ka mga produkto kag ginsulod sa ila bitbit nga bag.
Ginabanta nagabalor tanan sang P5,305 ang mga produkto nga ginpangkawat sang mga suspek.
Natigayon nga makapalagyo ang duha ka suspek apang si Pacheco ang nadakpan.
Sa karon, padayon pa ang imbestigasyon sang mga kapulisan sa nasambit nga insidente. | Judy Ann Juare
