Nakatakdang magdonate ang House of Representatives ng $100,000 para sa mga biktima ng lindol sa Turkey, na ngayon ay tinawag na Türkiye.
Sa isang pahayag, sinabi ng opisina ni Speaker Ferdinand Martin Romualdez, na ang pondo ay manggagaling sa Disaster Relief and Rehabilitation Initiative ng Speaker, na inilunsad noong ika-59 taong kaarawan nito noong Nov. 14 na nakalikom ng P70.92 million.
Sa ngayon, ang contributions sa naturang inisyatibo ng Speaker ay pumalo na sa P120 million, at ang isa sa mga benepisyaryo ay ang mga biktima ng sunog sa Navotas, mga apektado ng pagbaha sa Visayas at Mindanao, at mga biktima ng Typhoon Paeng.
Kaugnay nito, itu-turn over ni Romualdez ang mahigit $100,000 assistance kay Turkish Ambassador to the Philippines Niyazi Evren Akyol at asawa nitong si Inddri Puspitarasi ngayong araw. Sa gitna nito, kinilala ng naturang mambabatas ang tulong ng Turkiye sa Pilipinas matapos ang Super Typhoon Yolanda noong 2013.
