-Reymund Titong
KABANKALAN CITY, Negros Occidental — Sa tanan nga na-agyan nga kabudlayan sang Sitio Madaja sa syudad sang Himamaylan, nga anay gina-konsiderar nga may mabaskog nga impluwensya ang New People’s Army (NPA), sa karun naga-lukdo na sang pagkilala gikan sa gobyerno probinsyal sang Negros Occidental.
Sa labing una nga BALIK-Salig Awards and competition, nakuha sang Madaha Handweavers Association (MAHAWA) ang Best in ANP-PGNO Balik-Salig Community, Best in Mat weaving, kag isa man ka miyembro sang asosasyon ang gin gawadan sang pagkilala bilang “Most Dedicated Member,” nga amo si Enie Mordenio.
Ang Balik-SALIG awards ang isa ka inisyatibo sang gobyerno probinsyal sang Negros Occidental kaupod ang Association of Negros Producers (ANP) agud mahatagan pagtamod ang nagkalain-lain nga komunidad sa probinsya nga anay may mabaskog nga impluwensya ang New People’s Army (NPA).
READ: Lima ka organisasyon, nag-pakigbahin sa labing una nga Balik-SALIG awards, competitions
Suno kay Sybel Nobleza, external affairs manager sang ANP, ang pagkilala sa MAHAWA sa labing una nga BALIK-Salig awards ang nagapamatuod nga ang mga tawo sa kabukiran ang handa mag-tuon kag patin-aron ang ila mga komunidad, kun aktibo nga nagabulig sa ila ang gobyerno.
Dugang pa ni Nobleza, indi makilala ang MAHAWA kun indi paagi sa pagbinuliganay sang mga sektor sang gobyerno kag non-government organization sa pag dul-ong serbisyo kag bulig sa kabukiran sang Himamaylan.
Ginpasalamatan man ni Nobleza ang 94th Infantry Battalion sang Philippine Army, nga para sa iya, ang matuod nga nagdala sang pagbag-o sa Madaja.*
