-Reymund Titong
KABANKALAN CITY, Negros Occidental — Lima ka mga organisasyon sa probinsya sang Negros Occidental ang nagpakigbahin sa labing una nga “Balik-SALIG awards and competitions” sa Ayala Malls sa syudad sang Bacolod, humalin Mayo 27-30, 2024.
Suno kay Arlene Infante, presidente sang Association of Negros Producers (ANP), ang nasambit nga programa ang gin-plano agud pabaskugon ang mga indibidwal kag komunidad sa probinsya, sa diin puwede nila ipakita sang ila mga talento kag ika-sarang agud mapatin-ad ang ila pag-pangabuhi, paagi sa pag-ubra sang nagkalain-lain nga mga produkto.
Sa amo nga programa, nagpakigbahin ang Camingawan Diversified Workers Association (CADIWA) sa syudad Kabankalan, Madaha Hand Weavers Association (MAHAWA) sang Himamaylan, Sitio Maatop Community gikan sa banwa sang Hinobaan, Barangay Riverside Upland Famers Association (BRUFA) sa banwa sang Isabela, kag ang Kapatiran Community sa banwa sang Don Salvador Benedicto.
Ang mga nasambit nga organisasyon ang nag-pakita sang ila nagkalain-lain nga produkto himo sa mga materyales nga makit-an lamang sa palibot sang ila komunidad, kag gin-proseso nga mangin kalo, placemats, basket, banig, kag iban pa.
Ang Balik-SALIG awards ang isa man ka inisyatibo agud mahatagan man pagtamod ang nagkalain-lain nga komunidad sa probinsya nga anay may yara sang mabaskog nga impluwensya ang New People’s Army (NPA). Lakip man sa programa ang mga organisasyon nga gina-padalagan sang mga anay aktibo nga rebelde, nga nagbalik na sa sabakan sang gobyerno.
Iga-anunsyar ang nagdalaog sa nasambit nga kompetisyon sa maabot nga Mayo 30.*
