Naharang sa mga sundalo ug kapulisan sa Kidapawan City ang ismagul nga sigarilyo nga dalhon unta paingon sa Digos City nga naggikan pa sa Zamboanga del Sur.
Sakay sa van-type truck ang P437,000 kantidad sa imported nga sigarilyo nga gimaneho ni Anthony Villamor Torreon kauban ang helper niini nga si Ibrahim Macasipot Saliling.
Kinatibuk-ang 1,259 reams ang mga sigarilyo nga Port ug Greenhill nga ginama sa Indonesia.
Walay gipakitang mga papeles atol sa anti-crime checkpoint sa mga pulis ug mga tropa sa 39th Infantry Battalion sa Kidapawan-Digos Highway sa Barangay Paco sa Kidapawan City sa dihang gipangayuan ang mga nahisgutan.
Apan gipamugos sa duha ka dinakpan nga gibayaran lamang sila nga ihatod ang maong mga kontrabando paingon sa Digos.
Kasamtangan, temporaryong gibalhug sa sa Kidapawan City Police Station ang mga dinakpan.
