Aprubado na sang Sangguniang Panlalawigan ang ginaduso nga ordinansa ni City Councilor Fernando Luis Viterbo nga may tigulo nga “An Ordinance Enacting the Tourism Code of Roxas City, Province of Capiz” sang damlag lang.
Ini ang ginkumpirma ni Viterbo sang ma-interview sang Brigada News FM Roxas City.
Suno diri, katuyuan sang nasambit nga ordinansa nga mapasanyog ang industriya sang turismo sa siyudad sang Roxas kag sa bug-os nga probinsiya sang Capiz.
Magahimo man ini sang standard sa tourism establishments kag magahatag sang minimum requirements sa hotels, restaurants, tourist guides kag iban pa nga may kaangtanan sa turismo.
Ginpahayag ni Viterbo, nga antes ginpasar ang amo nga ordinansa madamo sang natabo nga revisions bangud luyag nila nga mangin business friendly ordinance ini agud indi man mabug-atan ang mga establisyemento.
Nagalaom naman ang natungdan nga magasunod ang mga owner sang establisyemento sa nasambit nga ordinansa bangud kun indi may yara sila sang penalidad nga paga-atubangon.
Ini amo ang minor and major penalties.
Ang minor penalties amo ang warning kag magabayad sang nagakaigo nga penalidad.
Ang major penalties amo ang subject for closure kun pila na ka beses naglapas sa ordinansa ang establisyemento apang ini ang maagi pa sa City Council kag sa City Tourism. | Judy Ann Juare
