Dul-an libo ka mga residente sa nagkadaiyang lugar sa Buhangin area ning syudad sa Davao ang nakabenipisyo sa gipahigayong relief operation sa 91.5 Brigada News Fm Davao nunot sa halapad nga pagbaha tungod sa pag-awas sa Davao River.
Bitbit sa pwersa sa Brigada ang mga pagkaon, biskwit, bottled water ug uban pa nga maoy gipang-apod-apod sa mga naapektuhang residente nga temporaryong gipahimutang sa lain-laing evacuation centers sama sa Jullivile Subdivision nga dunay pinakadaghang bakwit, Brgy. 5-A gym, Jade Valley Gym.
Ang naasoy nga mga tabang gikan sa mga tigpaminaw ning sibyaan human nga naglusad og tibook adlaw nga kampanya.
Niabot sa kapin P50,00.00 cash ang naipon nga gigamit usab sa pagpalit og dugang relief packs gawas pa sa mga ready-to-eat foods nga personal gihatud sa mga pribadong indibidwal, grupo ug mga kumpanya nga wala nagmakuli sa paghatag sa ilang mga gasa.
Luyo sa nasinati nga pagbaha ug kalisud sa ilang kahimtang karon, mapasalamaton ang mga residente gikan sa Jade Valley, Jullivile, San Rafael, gumikan sa mga hinabang nga niabot.
Samtang pasado alas dyes kagabie, moabot sa 500 ka food packs gikan sa grupong Santa Soldier ang gipanghatag sa mga residente sa Maa Riverside ug Bankerohan.
Karong adlawa usab ihatud sa Rotary Club ang mokabat sa 45 ka sako sa bugas nga mao usab ang bahin-bahinon alang sa mga residenteng apektado sa halapad nga pagbaha.
Sa karon nagpabilin pa gihapon ang tubig baha sa Jade valley samtang ang ubang lugarhinay-hinay na nga niubos ang lebel sa tubig baha kung diin problema na usab karon sa mga residente ang gibilin nga bagang lapok ug mga basura samtang ang City Social Welfare and Development Office usab ang nag-atiman na sa mga naapektuhan alang sa mga tabang nga itunol.
Kahibaluang sunay sa datus gikan sa City Disaster Risk Reduction and Management Office mokabat sa dul-an 1,000 pamilya ang apektado sa lapad nga pagbaha. BNFM-DAVAO
