Gi-imbestigahan na karon sa Philippine Drug Enforcement Agency (PDEA) XI ang gikaingong pag-ikyas ni kanhi City Information Office (CIO) sa Davao City nga si Jeffry Tupas ug mga kauban niini atol sa gikasang drug raid sa usa ka beach sa Mabini, Davao de Oro.
Gibutyag ni PDEA-XI Regional Director Aileen Lovitos nga giimbestigahan na karon ang alegasyong pag-ikyas sa kanhi CIO Chief aron masuta kung unsa ang tinuod nga nahitabo kalabot niini ug hugot gipanghimakak nga dunay nahitabong cover-up.
Dugang sa PDEA-XI nga ang nasikop nga 17 ka indibidwal mao matud pa ang subject sa planadong buy bust operation apan sukwahi kini sa unang pamahayag sa mga nadakpan nga daw si Tupas ug pipila ka indibidwal ang target sa maong operasyon.
Kahibaluang gikwestyon sa maong mga dinakpan ang wala pagkaaresto sa ubang mga personalidad nga gilangkuban sa mga doctor ug nurses ug ubang empleyado sa City Hall nga kauban ni Jefry Tupas. BNFM-Davao
