Reymund Titong
KABANKALAN CITY, Negros Occidental — Dugang nga imbestigahan sang Community Environment and Natural Resources Office (CENRO) -Kabankalan, ang semando nga dalan pakadto sa gin-bulldoze nga bahin sang baybay sa Purok 6, Sitio Bil-at, Barangay Caliling, sa banwa sang Cauayan.
Sa interview sang Brigada News FM-Kabankalan kay CENRO-Kabankalan Environmental Management Specialist Lucia Salazar, iya ginpasiguro nga imbestigahan nila sang tudo ang natabo nga pag pang-bulldoze sang dagat, lakip na ang ginbak-bak nga parti sang bukid para mabutangan sang sementado nga dalan.
Ang nasambit nga dalan ang gikan sa highway padulong sa kilid sang dagat nga gin-bulldoze.
Madumduman nga ang gin-bulldoze nga pati sang dagat ang isa ka protected kag nesting site sang mga pawikan kag iban pa nga mga marine animals.
Suno kay Salazar, gina-alegar nga ang rason sa pag pang bulldoze sa dagat amo agud himuon ini nga isa ka Jetski area.
Dugang pa niya, ang may mas gahom sa pag protektar sa mga dunang manggad sang lugar amo ang mismo lokal nga panguluhan sang banwa, bangud ila ini nga local conservation area (LCA).
Una na nga gin-report nga wala sang Environmental Compliance Certificate (ECC) ang operasyon sa kilid dagat, nga nagakahulugan nga ini ang isa ka illegal nga operasyon.
Gina-alegar nga si William Chua ang nagsugo kag ang nagapanag-iya sang bulldozer nga gina-gamit sa operasyon.
Suno naman sa kapitan sang barangay nga si Josel Popioco, ang ila lamang nahibaluan nga may ECC amo ang rest house ni Chua kag wala na sang iban pa.
Ginpa-untat na sang banwa ang illegal nga pag pang-bulldoze sa dagat, suno kay Cauayan Mayor John Rey Tabujara.
Napalab-ot naman sa Environmental Management Bureau (EMB) sang Department of Environment and Natural Resources (DENR) ang ini nga problema, suno kay Salazar. — BNFM Kabankalan
