Arnel Callet
KABANKALAN CITY, Negros Occidental — Ginakabalak-an sang mga residente ang epekto sa marine ecosystem sang ginapatigaon nga pagbuldos sang mga bato sa kilid dagat sa Purok 6, Sitio Bil-at, sa Barangay Caliling, banwa sang Cauayan sang Lunes, Oktubre 21.
Pahayag sang kapitan sang barangay nga si Josel Popioco, ini ang una nga tion nga ginbuldos ang kilid sang dagat kag gintumpok ang mga bato.
Suno sa kapitan, ang ginaalegar tag-iya sang bulldozer kag nag sugo nga buldoson ang kilid sang dagat amo si William Chua, isa ka pribado nga inbidwal nga may yara sang rest house malapit sa lugar.
Dugang pa ni Popioco, wala man naka-labay sa plano sang pagbuldos sa konseho sang barangay, kag wala ini may napasar snga resolusyon nga nagahatag pahanugot sa pagkut-kut sa kilid sang dagat.
Sa inisyal nga impormasyon nga nakuha sang Brigada News FM-Kabankalan, wala sang Environmental Compliance Certificate (ECC) ang pagbuldos sang dagat nga ginkuha gikan sa Department of Environment and Natural Resources (DENR).
Sang ginkadtuan sang Brigada ang lugar, ang ginkutkutan nga porsyon sang dagat ang ginabulubanta yara sa 300 metros ang kalayuon gikan sa Mangrove Protected Area sa barangay.
Suno man sa mga bantay dagat kag pipila ka residente, ang ginbuldos nga porsyon sang dagat ang breeding ground sang mga pawikan kag iban pa nga mga marine animals, kag ginakabalak-an ang negatibo nga epekto sini sa marine life.
Na inspeksyon naman sang City Environment and Natural Resources (CENRO) Kabankalan ang lugar kag napalab-ot naman ang problema sa Environmental Management Bureau (EMB) Regional Office VI. -BNFM Kabankalan
