Mityabaw na ang mga molopyo sa tulo ka mga barangay sa lungsod sa Asturias Cebu gumikan sa grabe ka daghan sa mga langaw nga nihugpa sa ilang lugar.
Kini ilang nasinati sulod sa halos 3 na matud pa ka bulan diin ilang gitumbok nga hinungdan niini mao ang mga poultry sa ilang dapit.
Ang mga barangay nga gihugpaan sa grabe jud nga langaw mao ang Barangay Manguiao, Magcalape ug Agtugop.
Matud sa mga molopyo sa maong mga dapit nga dili na gane sila magkadungan og kaon sa ilang pamilya gumikan sa ilang paglikay sa mga langaw ug adunay mga panahon nga mosulod sila sa kwarto aron adto mokaon o ba kaha mosulod na lang sa mosketero.
Ilang gikabalak-an ang ilang panlawas ilabi na sa mga kabataan gumikan kay gikan man gyud sa hugaw ang mga langaw nga motugpa sa ilang mga pagkaon.
Gisulayan sa pagkuha sa Brigada News FM Cebu ang habig sa Regional Health Unit sa Asturias apan wala kini mohatag og mga pamahayag kay ang buhatan na matud pa sa Mayor ang motubag niini apan wala usab ang ilang Mayor kay mitambong kini sa SONA sa Presidente.
Nasayran nga ang lungsod aduna na kini giumol nga TASK FORCE LANGAW aron mosusi usab ngadto sa mga poultry sa maong lungsod diin adunay 21 ka mga poultry.
Giingung matag ingun niaron nga panahon modagsang gyud ang grabe nga langaw ilabi na panahon nga ting harvest usab sa mga manok apan ang nahisgutang tulo ka barangay mao lamang ang grabeng naapektuhan. | Jonalyn Jumabis
