BORACAY — Sampae ag sabunot ro inabot it sangka 32yo nga babaye halin sa anang live-in partner bangud eamang sa mga text messages.
Samtang sampae man ag euok ro inabot ku andang daywang dag-on nga unga nga eaeaki.
Sa interview it Brigada News FM Kalibo sa babaye nga taga Manocmanoc sa isla it Boracay, alas dos kahapon it hapon kat nakauli imaw halin sa anang trabaho bilang masahista ag house keeper.
Samtang naga meryenda segun imaw ag tueog ro anang live-in partner, may nagtext sa anang cellphone it ‘Hi po’.
Kat gin-replayan segun raya ku ginang kung sin-o ro naga-text hay nagreply man segun raya it ‘hindi mo na ba naaalala ang ginawa natin’ ag maabu pang iba nga naka save pa makarun sa cellphone it ginang.
Owa man segun imaw nagselos ag sa baylo hay ginpukaw nana ro suspek para ipasayud ro mga text messages, pero naakig segun raya ag gulpi eang sinampae ro andang 2yo nga unga ag gin-euok pa hasta sa imaw eon segun ro ginsakit it suspek.
Insigida man nga nakapangayo it bulig ro biktima ag parehu sanda nga dinaea it suspek sa Boracay PNP.
Igto hay nag-settle ro mag-live-in partner pero indi eon segun makipagbalikan pa it biktima sa suspek.
Samtang, ginhambae pa it biktima nga nagpamaeag ro suspek kabii nga sunugon ro andang baeay sa oras nga maghalin eon raya. / ANN DESLENE SALAZAR
