NABALAKA ang 537 ka pamilya nga naapektuhan sa sunog sa Purok Saeg Barangay Calumpang, human sa taho nga ilang nadawat nga dili na sila pabalikon sa ilang pinuy-anan tungod ‘private property’ ang maong lugar.
Sumala ni Arlene Saldo, 44 anyos, ang ilang panginabuian mao ang pagpanagat ug anaa sa 20ka tuig na silang nagpuyo sa Purok Saeg. Apan kung dili na sila tugutan nga mobalik pa sailang lugar, hinaot nga tagaan na lamang sila og relocation area kung asa sila puwedeng magpatukod sailang balay ug magsugod og bag-ong kinabuhi human sa trahedya nga ilang nasinatian. Ginaproseso na matud pa sa City Housing and Land Management Office ang paliton nga luna alang kanila.
Plastar nga pinuy-anan lamang ang sugyot sa pamilya nga nasunugan ug andam silang magpaabot kung kanus-a kini mahatag kanila. Ang uban nga pamilya anaa nagpuyo sa ilang mga paryente tungod wala usab silay igong salapi nga ikabayad sa pagrenta og balay nga ilang mapuy-an. Busa ang pipila niini nagpabilin na lamang sa Romana Elem. School nga maoy kasamtangan evacuation center sa apektadong pamilya. ( Enamie Mogpon)
