CENTRALIZED na ang pagpanghatag og ayuda sa mga nasunugan sa purok Saeg, Brgy.Calumpang nga anaa sa evacuation center.
Kini ang gibutyag ni Kapitan Ryan Dupalco sa Brgy.Calumpang tungod gusto nga mahimong hapsay ug matugutan lang ang mga lehitimong biktima sa sunog nga maoy makadawat sa hinabang.
Asoy ni Dupalco nga tanang dry goods, canned goods gawas sa hot meals ang moagi na sa barangay.
May green card nga ihatag sa mga biktima sa sunog nga timailhan nga lehitimo kining makadawat sa unsa mang hinabang nga moabot sa barangay.
Nasaksihan ni Dupalco nga nagalinya apil sa mga nasunugan kadtong dili taga purok Saeg ug wala na nagkadimao nga maoy wala na gikahimut-an sa taga City Health Office ug RHU-Calumpang labi pa nga nagpadayun pa ang bahad sa COVID-19.
Sa karon, hangyo ni Dupalco sa kadtong adunay mabalhinan nga paryente nga didto na lang usa motinir tungod wala na nila ginatugutan nga makabalik ug makapatindog og balik sa ilang balay.
Samtang gituohan niini nga ang relokasyon ang dili usab madali dali tungod madangtan pa kini og mga katuigan.
Nasayran nga ang nasunog nga area ang gipanag-iyahan matud pa sa pamilya Habaluyas nga gituohang naprenda sa usa ka bangko. Apan segun ni Dupalco subay sa 2014 tax mapping, adunay nakapangalan ang portion sa nasunog nga area ngadto sa pipila ka tawo.
