SAMDAN sa ulo ang usa ka babaye human mabangga ang ilahang gisakyan nga traysikel sa passenger side sa usa ka tanker truck nga adunay kargang mantika.
Nailhan ang biktima nga si alyas Jesamie, nagpuyo sa Olaer, Barangay Apopong, GenSan. Sa report sa TEU alas 7:50 kagabie, Marso 11 nahitabo ang insidente sa National highway, South Cotabato- Makar road, Yu Village, Barangay Apopong, GenSan.
Gibutyag sa tricycle driver nga si Christian Villorente, wala matud pa niya nakita ang miliko nga tanker truck pasulod sa warehouse sa nahisgotang lugar rason sa nahitabong bangga.
Pauli na matud pa sila sa Purok Olaer kauban ang iyahang asawa ug anak dihang mahitabo ang bangga.
Andam sab makig-areglo ang drayber sa tanker truck sa drayber sa traysikel ug gipahimangnoan kini sa kapulisan nga mag-amping kanunay sa pagmaneho ilabi na sa mga national highway. I Enamie Mogpon