RE-ACTIVATION sa Motorized Transport Franchising and Regulatory Board (MTFRB) sa GenSan ang unang lakang nga himoon ni Konsehal Dominador Lagare Jr., dungan sa subling paggunit niini sa komitiba sa transportasyon.
Human kini nahimong chairman sa komitiba sulod sa duha katuig ug miluwat atong 2018. Matud ni Lagare Jr., sa pagbuhi sa board buot niyang ibutang na ang standard ‘fare matrix’ o pletihan sa traysikel sa matag kilometro.
Tungod ang pagpangayo og mahal nga plete sa pipila ka traysikel drayber sa mga pasahero ang dugay nang problema sa siyudad. Dugang sa opisyal, angayang hugot na mapatuman ang pletehan sa traysikel ilawom sa gimugna nga Comprehensive Land Transportation and Traffic Code.
Asa ilawom sa IRR sa maong balaud mao ang pagpatuman sa clustering ug pagtunga sa GenSan sa upat ka color-coded clusters. Gi-adopt usab sa maong balaud fare matrix aron malikayan ang sagad isyu sa overcharging sa pipila ka drayber. ( Richel Gubalani)
