-Reymund Titong
KABANKALAN CITY, Negros Occidental — Pagapatigayonon kada Sabado ang isa ka prayer rally sa banwa sang Hinigaran samtang wala naga-nubo ang presyo sang kuryente sang Negros Occidental Electric Cooperative (NOCECO).
Sa press conference nga gin-patigayon ni Hinigaran mayor Nadie Arceo, bilang amay sang iya banwa, ini ang maga-panindugan kaupod ang linibo ka mga kunsomidores sang NOCECO sa pag-protesta sa pag-panubo sang presyo sang kuryente kag pagpatigayon ang panibag-o nga eleksyon sang mga Board of Directors (BOD) sini.
Dugang pa ni Arceo, kada Sabado ang pagpatigayon sang prayer rally sa Hinigaran Public Plaza, kag gina-ganyat man ang iban nga kunsomidores nga mag-isa sa pag-panawagan sa gobyerno nasyunal nga panubu-on ang presyo sang kuryente sang kooperatiba.
READ: HISTORIC FIRST: Labing una nga protesta batok sa NOCECO humalin 1982, natigayon sa Hinigaran
Para kay Arceo, ang iya pagpanindugan batok sa NOCECO amo ang iya “obligasyon bilang alkalde nga mangin tingog sang mga pumuloyo bisan ako lang isa ang magasulong sang kawsa.”
Si Arceo ang una nga alkalde sa 32 tanan ka syudad kag banwa sang Negros Occidental, nga nagtindog kaupod sang mga kunsomidores sang NOCECO nga nag-protesta.*