-Reymund Titong
KABANKALAN CITY, Negros Occidental — Sa pag-bubú sang ulan sa kaumhan bangud sa pag-sulod sang La Niña, nagbubu man sang kahadlok, matapos may duwa nga ginluthang-patay sa Sitio Pitgong, Barangay Oringao, sa syudad sang Kabankalan, pasado las-3 sang hapon, Hunyo 2.
Sa walo tanan ka mga sibilyan nga gin pangpatay sa bulan sang Abril sa probinsya sang Negros Occidental, nga lunsay gin pang-akó sang New People’s Army (NPA), ang panibag-o nga kaso sang pag-patay sa Kabankalan ang indi pa ma kumpirmar kun sila man ang may kahimu-an.
Kun sila gid man ang may kahimu-an, ano ang rason? Suno kay Lieutenant Colonel Van Donald Almonte, commanding officer sang 94th Infantry Battalion, wala sa rekord sang intelligence unit sini nga naga-suporta ukon anay miyembro sang NPA ang mag-tiyo nga Raniel kag Loreto Delos Santos, buot silingon, wala ini may nakita nga dako nga rason nga patyon sila sang NPA.
Dugang pa ni Almonte nga ang lugar sa diin gin-luthang ang mag-tiyo ang wala nalakip sa mga barangay sa syudad nga gina-kabig “red area”, insurgency-affected, ukon may presensya ang NPA.
Sandig naman sa impormasyon sa lugar, naga-pamulang ini ang duwa sang may yara armado nga grupo nga nagpalapit kag nag-tiro sa duwa, kag matapos ang pagpang-luthang may nakabati sang singgit nga “ang Wala sala palagyo, NPA ni!”
Sabat naman ni Almonte, posible nga ang mga suspetsado sa pag-patay ang may daan nga aligutgut sa duwa, rason nga ginsakyan ang pagpamatay sang NPA, para takpan ang amo nga krimen.*
