-Reymund Titong
KABANKALAN CITY, Negros Occidental — Gina-kabig nga “historic first” ukon una sa kasaysayan sang Negros Occidental Electric Cooperative (NOCECO) nga nagpatigayon sang isa ka protesta ang mga kunsomidores sini, humalin nga gin-tukod ang kooperatiba sang 1982, bangud sang tuman nga pag-taas sang kuryente.
Suno kay Irene Viason, lead convenor sang South Negros Power Advocates (SNPA), halos isa ka libo nga mga kunsomidores sang NOCECO ang nag-upod sa pag-protesta paagi sang unity walk sa banwa sang Hinigaran sang Sabado, Hunyo 1.
Dugang pa ni Viason, ang pagtaas sang kuryente sang NOCECO ang nag-apekto sa masobra 100,000 nga kunsomidores sang kooperatiba gikan sa central padulong sa sur nga bahin sang probinsya. Kag ang ini nga problema, suno pa sa iya, nga dapat tagaan pagatawod kag masulosyonan ni President Ferdinand Marcos, Jr. kag sang Energy Regulatory Commission (ERC).
Sa piyak nga bahin, suno naman kay Edmund Arceo, anay Board of Director (BOD) sang NOCECO, nga ang pag-protesta ang naga-patimaan sang mabaskog nga pwersa sang mga kunsomidores nga gina-kundinar ang “kapabayaan” sang executive committee sang kooperatiba nga gin-butang sang National Electrification Administration (NEA), matapos sini gin pangkas-kas ang general manager nga si Engr. Ray Bustamante, kaupod ang mga BODs.
Naga-panawagann naman si Arceo nga magpatigayon na sang panibag-o nga eleksyon nga maga-pungko bilang BOD sang NOCECO agud makadihon sang mga stratehiya nga makabulig panubo sa presyo sang kuryente.*
(Second part: Sinimana nga prayer rally batok sa NOCECO, pagapatigayon sa banwa sang Hinigaran)
