GIPUNTO karon ni Brigada Elmer V. Catulpos kung lig-on ang mga economic drivers, mas daghan ang makatrabaho, mas dako ang buhis sa gobyerno ug mas daghan ang serbisyong libre nga mahatag aron mas daghan usab ang makaangat gikan sa kalisod.
Kini ang nahimong tubag ni Brigada Elmer sa pangutana nganong unahon man nang GenSan dream tungod taas na ang level of frustrations sa kadaghanan karon tungod kay makita man nga naay pagpangabuso sa gahum sa mga ilitistang politiko, ug tinuod gyud nga daghan ang problema sa siudad nga angayang tutukan aron maka-angat gikan sa kalisod ang daghang katawhan.
Giklaro ni Brigada Elmer nga ang GenSan dream, mao ang label o pangalan sa iyang plataporma de gobyerno nga dunay kompletong detalye gikan sa mga gagmay’ng butang nga pwedeng himuon dayon aron makatabang sa pagsulbad sa mga nag-unang problema sa siudad.
Aduna kini klarong direction kung unsay atong padulngan sa kaugmaon sa GenSan sama sa pagpalig-on sa fishing industry, turismo, manufacturing ug business process outsourcing.
Kung malambuon ang maong mga sector, makaangkon og mas dakong buhis hinungdan mas daghang serbisyo nga mahatag sa katawhan, apan kining tanan dugang ni Brigada Elmer mag-agad sa lider, nga sama niya adunay big dream alang sa GenSan nga makab-ot usab sa pagtinabangay sa tanan.
