Sambilog ka pulis nga ginkilaea nga si Police Staff Sergeant Marvin Seasol it Iloilo City Police Office (ICPO) hay presente nga naga-atubang sa sunud-sunod nga mga kasong administratibo ag ginpahalin eun sa serbisyo.
Nagpaguwea it order of dismissal ro Napolcom nga pirmado ni Police Major General Rolando Hinanay, director for Personnel and Records Management, Camp Crame bangud sa kaso ni Seasol ku 2018.
Base kay Napolcom Region 6 director Joseph Celis, ro nasambitan nga kaso hay angot sa pagpanakit ag pagpamaril it pulis sa anang kapitbahay sa Oton, Iloilo ku Hulyo 5, 2018.
Ku nagtaliwan nga dag-on, Marso 24, 2021, na-tag man si Seasol sa pagpamaril sa sambilog ka pedicab driver nga si Normando Estrebor, sa Recto Street. Barangay Poblacion West, Oton.
Base sa incident report halin sa Oton police station, naghaboy it bato si Seasol sa baeay it pamilya Estrebor.
Bangud dikara, naguwa it baeay si Normando agud tan-awon kung ano ro natabo, bigla eun eamang raya ginbaril it pulis nga nasayuran nga hilong./JIL B. LACSON
