LEGAZPI CITY – Nangangapodan an Public Safety Office (PSO) Legazpi sa gabos na mga commuter na pormal mag-report sa mismong opisina ninda kontra sa mga abusadong tricycle drivers sa syudad.
Dakol na naman kaya su boot na mga tricycle drivers sa syudad na dai nag-uutob sa tamang fare matrix asin nagsisingil nin sobra sa mga pasahero orog na duman sa mga bako man taga digdi.
Apwera kaini, igwa man su boot na mga drivers na nambabastos asin nangtatakot nin mga pasahero.
Sa intrevista kan Brigada News FM Legazpi kay PSO Legazpi Chief Rolly Esguerra, sinabi niya na dapat idirekta an reklamo sa saindang opisina nganing matawan nin maninigong aksyon asin mapanimbag an mga abusadong driver.
Segun saiya, dai na kuta dapat na ipaagi sa social media o kaya ma-post nin reklamo ta dai man su boot yan maaksyunan.
Pig-eenganyar niya man an publiko na dai ipag-tolerate an siring na mga aksyon kan tricycle drivers huli ta igwa sindang kamumugtakan kun pormal na ma-report an complainant.
